’’ماہنامہ نقیبِ ختمِ نبوت امیرِ شریعت نمبر ( جلد دوم)‘‘
ماہنامہ نقیب ختم نبوت (دار بنی ہاشم، مہربان کالونی، ملتان) اس سے قبل امیر شریعت حضرت سید عطاء اللہ شاہ بخاری نور اللہ مرقدہ کے حالات اور جدوجہد کے حوالہ سے امیر شریعت نمبر کی ایک ضخیم جلد پیش کر کے ملک بھر کے علمی و دینی حلقوں سے دادِ تحسین پا چکا ہے۔ اور یہ اس کی دوسری جلد ہے جو پونے چھ سو صفحات پر مشتمل اور عمدہ کتابت و طباعت اور مضبوط جلد کے ساتھ مزین ہے۔
تذکرہ حضرت شاہ جیؒ کا ہے اور لکھنے والوں میں ماسٹر تاج الدین انصاریؒ، شیخ حسام الدینؒ، آغا شورش کاشمیریؒ، مولانا مجاہد الحسینی، سید عطاء الحسن بخاری، حکیم محمود احمد ظفر، ملک اسلم حیاتؒ، پروفیسر خالد شبیر احمد، حافظ عبدالرشید ارشد، حفیظ رضا پسروری، اور جانباز مرزاؒ جیسے اہلِ قلم شامل ہیں۔
سید کفیل بخاری مبارک باد کے مستحق ہیں کہ وہ اپنے عظیم المرتبت نانا کے حالاتِ زندگی کی صورت میں تاریخ کے ایک ناقابلِ فراموش باب سے نئی نسل کی شناسائی کا اہتمام کر رہے ہیں۔
’’ماہنامہ البنوریہ (حضرت جیؒ نمبر)‘‘
ماہنامہ البنوریہ (جامعہ بنوریہ سائٹ کراچی) نے امیر تبلیغ حضرت مولانا انعام الحسن کاندھلوی نور اللہ مرقدہ کے حالاتِ زندگی اور خدمات پر خصوصی اشاعت کا اہتمام کیا ہے جو علامہ سید سلمان ندویؒ، حضرت مولانا سید ابوالحسن علی ندوی، مولانا سید محمد ثانی حسنیؒ، مولانا مفتی احمد الرحمانؒ، مولانا محمد یوسف لدھیانوی، مولانا وحید الدین خان، مولانا تقی الدین ندوی، مولانا محمد رابع حسنی، مولانا محمود الحسن اعظمی، مولانا شمس الحق ندوی اور مفتی محمد جمیل خان جیسے اصحابِ قلم کی نگارشات پر مشتمل ہے۔ اور حضرت جیؒ کے حالاتِ زندگی کے ساتھ ساتھ دعوت و تبلیغ کی عالمی تحریک کے اصول و طریق کار کے بارے میں بیش قدر معلومات کا احاطہ کیے ہوئے ہے، کم و بیش ساڑھے تین سو صفحات کے اس ضخیم نمبر کی قیمت ایک سو روپے ہے۔
’’معالم العرفان فی دروس القرآن (جلد ۱۷)‘‘
حضرت مولانا صوفی عبد الحمید سواتی دامت برکاتہم کے دروس قرآن کا سلسلہ جو ایک عرصہ سے جاری ہے اور ملک بھر کے علماء و خطباء ان سے مسلسل استفادہ کر رہے ہیں، یہ اس کی آخری کڑی ہے، اور اس کے ساتھ ہی قرآن کریم کے عام فہم ترجمہ و تشریح کا یہ سلسلہ مکمل ہو گیا ہے۔ یہ جلد سورۃ الواقعہ تا سورۃ التحریم پر مشتمل ہے جبکہ آخری پارہ کے دروس اس سے قبل شائع ہو چکے ہیں۔
حضرت صوفی صاحب مدظلہ کے ان دروس کی امتیازی خصوصیت ہے کہ قرآن کریم کے عام فہم ترجمہ و تشریح کے ساتھ فلسفہ ولی اللٰہی کے مطابق دورِ حاضر کے مسائل و مشکلات کا حل پیش کرتے ہیں، اور کفر و الحاد کے فتنوں کی نشاندہی کرتے ہوئے ان کے زہر کا تریاق بھی ان میں موجود ہوتا ہے، جو اس دور میں عام پڑھے لکھے احباب اور علماء و مدرسین کے لیے بیش بہا ذخیرہ ہے۔
دروسِ قرآن کا مکمل سیٹ بیس جلدوں پر مشتمل ہے جس کا مجموعی ہدیہ اکتیس سو پچپن (۳۱۵۵) روپے ہے، اور مکتبہ دروس القرآن، مدرسہ نصرۃ العلوم، فاروق گنج، گوجرانوالہ سے طلب کیا جا سکتا ہے۔
’’تفسیر آیت النور‘‘
حضرت شاہ رفیع الدین محدث دہلویؒ کا رسالہ تفسیر ’’آیت النور‘‘ حضرت مولانا صوفی عبدالحمید سواتی مدظلہ کے مقدمہ و تحقیق اور حضرت مولانا حافظ عزیز الرحمٰن ایم اے کے اردو ترجمہ کے ساتھ اداره نشر و اشاعت مدرسہ نصرۃ العلوم فاروق گنج گوجرانوالہ نے شائع کیا ہے، جس کے بارے میں دور حاضر کے عظیم مفسر قرآن کریم حضرت علامہ شمس الحق افغانی کا ارشاد ہے کہ
’’زیر تقریظ رسالہ کو جو میں نے دیکھا تو اس سے میں نے استفادہ کیا جس کی بنا پر میں یہ کہہ سکتا ہوں کہ آیت نور کے متعلق تفاسیر کا جس قدر ذخیرہ موجود ہے، یہ چھوٹا سا رسالہ ان سب پر بھاری ہے۔‘‘
ایک سو کے لگ بھگ صفحات پر مشتمل اس رسالہ کی قیمت ۳۹ روپے ہے۔
’’سفرِ دیدہ نم‘‘
تحریکِ ختم نبوت کے باہمت راہنما حضرت مولانا تاج محمود رحمہ اللہ تعالیٰ کے فرزند و جانشین صاحبزادہ طارق محمود صاحب با ذوق دانش ور ہیں جو جہد و عمل اور تحریر و تقریر دونوں جگہ اپنے والد مرحوم کی روایات کو زندہ رکھے ہوئے ہیں۔ ۹۴ء میں انہیں حرمین شریفین کی حاضری کی سعادت حاصل ہوئی تو انہوں نے اپنے مشاہدات و تاثرات کو قلمبند کر کے دیگر احباب کو بھی شریکِ جذبات کرنے کا اہتمام کر لیا۔ یہ صرف سفرنامہ نہیں بلکہ متعلقہ مقامات کے بارے میں معلومات کا ذخیرہ بھی ہے جو صاحبزادہ کے ذوق اور محنت کا آئینہ دار ہے۔ صفحات ۱۴۰، عمده کمپوزنگ و طباعت، خوبصورت مضبوط جلد، قیمت ۷۰ روپے، ملنے کا پتہ: مکتبہ ہفت روزہ لولاک، جامع مسجد محمود، ریلوے کالونی، فیصل آباد۔
’’تصوف و سلوک‘‘
پیر طریقت حضرت مولانا غلام حبیب نقشبندی قدس اللہ سرہ العزیز کے خلیفہ مجاز حضرت مولانا حافظ ذوالفقار احمد نقشبندی زید مجدہم نے اس کتاب میں علمِ تصوف کے تعارف اور تصوف و سلوک کے آداب و اسباق پر مشتمل معلومات کو ایک اچھی ترتیب کے ساتھ جمع کیا ہے، اور تصوف و سلوک کے بارے میں مختلف حلقوں کی طرف سے اٹھائے جانے والے شبہات و سوالات کا بھی جائزہ لیا ہے۔ صفحات ۲۳۲، کمپوزنگ و طباعت معیاری، خوبصورت مضبوط جلد، قیمت درج نہیں۔
’’خطباتِ دین پوری (جلد سوم)‘‘
پاکستان کے معروف خطیب حضرت مولانا عبد الشکور دین پوری رحمہ اللہ تعالٰی کے خطبات کے دو مجموعے اس سے قبل منظر عام پر آچکے ہیں، اور یہ ان کے خطبات کی تیسری جلد ہے جس میں عظمتِ قرآن، صحابہ کرامؓ کا عشقِ رسولؐ، شادی و نکاح، فاروقؓ و حسینؓ، موت و حقوقِ والدین، فکرِ آخرت، جہاد فی سبیل اللہ، اور کلمہ طیبہ جیسے اہم عنوانات پر مولانا دین پوری کے خطبات کو جمع کیا گیا ہے۔
خطبات کے مرتب مولانا قاری جمیل الرحمان اختر ہیں جو ان معلوماتی خطبات کو خوبصورت ترتیب کے ساتھ پیش کر کے خطباء کرام کا کام آسان کر رہے ہیں اور ان کی دعائیں لے رہے ہیں۔ صفحات پونے چار سو، عمدہ کمپوزنگ و طباعت، مضبوط جلد، قیمت ایک سو چالیس روپے، ملنے کا پتہ: جامعہ حنفیہ قادریہ، ۲۸۵ جی ٹی روڈ باغبانپورہ، لاہور۔
’’معارف التجويد‘‘
شعبہ تجوید معارفِ اسلامیہ اکادمی، گکھڑ ضلع گوجرانوالہ کے صدر مدرس قاری حبیب الرحمان ہزاروی صاحب نے زیر نظر کتاب میں تجوید کے مسائل و احکام مرتب کیے ہیں اور فنی مسائل کے ساتھ ساتھ قرآن کریم کی جمع و ترتیب اور قراء عشرہ کے تعارف کے بارے میں مفید معلومات بھی شامل کر دی ہیں۔ تجوید و قراءۃ کے نصاب کے لیے یہ ایک مفید کتاب ہے۔ صفحات ۱۳۰، قیمت درج نہیں، ملنے کا پتہ: ندوۃ المعارف، گکھڑ ضلع گوجرانوالہ۔
’’نصیر المنطق‘‘
یہ فنِ منطق میں اردو کا ایک مختصر اور جامع رسالہ ہے جو مدرسہ مطلع العلوم بنارس (انڈیا) کے استاد حضرت مولانا محمد یوسف عباسی پشاوری کی تالیف ہے اور مکتبہ شجاعت خان راحت آباد ڈاک خانہ فارسٹ کالج پشاور کی طرف سے فاضل نوجوان مولانا شمس الرحمان نعمانی نے شائع کیا ہے۔ ستر کے لگ بھگ صفحات کے اس رسالہ کی عام قیمت ۱۴ روپے جبکہ طلبہ کے لیے ۱۲ روپے ہے اور اسے جامعہ مظاہر العلوم جی ٹی روڈ گوجرانوالہ سے طلب کیا جا سکتا ہے۔
’’تحریفِ بائبل بزبانِ بائبل (حصہ انجیل متی)‘‘
مولانا عبد اللطیف مسعود بائبل کے مطالعہ کا خصوصی ذوق رکھتے ہیں اور بائبل ہی کی زبان میں بائبل کے تحریف شدہ ہونے پر مسلسل مقالات و مضامین پیش کرنے کے علاوہ ’’تحریفِ بائبل بزبانِ بائیل‘‘ کے عنوان سے تقریباً ایک ہزار صفحات کی ضخامت پر مشتمل ایک بیش قیمت اور معلوماتی کتاب بھی تالیف کر چکے ہیں۔ یہ کتاب ابھی کتابت کے مرحلہ میں ہے اور اس کا ایک حصہ انہوں نے زیر نظر رسالہ کی صورت میں الگ شائع کیا ہے جس میں انجیل متی کے حوالے سے بائبل کے تضادات اور تحریفات کی نشاندہی کی گئی ہے۔ صفحات ۶۸، ناشر: عالمی مجلس تحفظ ختم نبوت ڈسکہ۔ ملنے کا پتہ: جامع مسجد خضری، ڈسکہ ضلع سیالکوٹ۔
’’مسئلہ توحید قرآن مجید اور کتبِ سابقہ کی روشنی میں‘‘
مولانا عبد اللطيف مسعود نے زیر نظر رسالہ میں مسئلہ توحید کے مختلف پہلوؤں کی وضاحت کی ہے اور قرآن کریم کے ساتھ ساتھ کتبِ سابقہ کے حوالے اور عبارات پیش کر کے عقیدہ توحید کی اہمیت پر روشنی ڈالی ہے۔ صفحات ۳۶، ملنے کا پتہ: جامع مسجد خضریٰ، ڈسکہ ضلع سیالکوٹ۔
’’اسلامی انقلاب کی جدوجہد‘‘
ملک کے معروف دانشور ڈاکٹر محمد فاروق خان نے اسلام کی دعوت و تبلیغ اور دین کے غلبہ و نفاذ کے لیے کام کرنے والی مختلف تحریکات کے افکار و نظریات اور طریق کار کا جائزہ لیا ہے اور زیر نظر کتابچہ میں ان کی کوتاہیوں کی نشاندہی کرتے ہوئے ’’انقلاب کا صحیح لائحہ عمل‘‘ کے عنوان سے اپنا نقطہ نظر وضاحت کے ساتھ پیش کیا ہے۔ صفحات ۱۶۸، قیمت ۳۰ روپے، ناشر: المورد ۹۸/ای، ماڈل ٹاؤن، لاہور۔
’’جب حضور ﷺ آئے‘‘
محمد متین خالد صاحب باہمت اور خوش ذوق نوجوان ہیں جو ختم نبوت اور تحفظ ناموس رسالتؐ کے محاذ پر مسلسل سرگرم رہتے ہیں۔ زیر نظر کتاب میں انہوں نے جناب رسالت مآب ﷺ کی ولادت با سعادت کے بارے میں مختلف مکاتب فکر کے اکابر علماء کرام اور اصحاب قلم کی منتخب نگارشات کا ایک حسین گلدستہ پیش کیا ہے جو ان کی محبتِ رسولؐ کے عمدہ ذوق کا آئینہ دار ہے۔ صفحات ۲۲۴، خوبصورت مضبوط جلد، قیمت ایک سو پچاس روپے، ناشر: مکتبہ تعمیر انسانیت، اردو بازار، لاہور۔
