صوبہ سرحد کے علماء دیوبند کی سیاسی خدمات
پشاور میں جمعیت علماء اسلام پاکستان کی ’’خدماتِ دارالعلوم دیوبند کانفرنس‘‘ کے موقع پر پشاور کے محترم اور بزرگ عالم دین حضرت مولانا ڈاکٹر عبد الدیان کلیم نے ’’صوبہ سرحد کے علماء دیوبند کی سیاسی خدمات‘‘ کے نام سے ساڑھے تین سو سے زائد صفحات پر مشتمل مجلد اور خوبصورت کتاب پیش کی ہے جو دراصل ان کے ڈاکٹریٹ کے مقالہ کا ایک حصہ ہے۔ مقالہ میں تحریکِ آزادی، تحریکِ پاکستان اور پھر پاکستان میں نفاذِ شریعت کی جدوجہد میں صوبہ سرحد سے تعلق رکھنے والے علماء دیوبند کی خدمات کا تفصیل سے جائزہ لیا گیا ہے اور بہت اہم معلومات یکجا کر دی گئی ہیں۔
کتاب کی قیمت ۱۵۰ روپے ہے اور مکتبہ شجاعت، راحت آباد، ڈاکخانہ فارسٹ کالج، پشاور سے طلب کی جا سکتی ہے۔
خلاصہ تفسیر القرآن متعلقہ الجہاد الاسلامی
مدرسہ قاسم العلوم شیرانوالہ گیٹ لاہور کے استاذ تفسیر حضرت مولانا حمید الرحمٰن عباسی مدظلہ مختلف عنوانات پر قرآن کریم کی آیات کریمہ، متعلقہ احادیث اور ضروری تشریحات الگ الگ مجموعوں کی صورت میں پیش کر رہے ہیں جو ایک قابل قدر کاوش ہے۔ زیرنظر دو جلدیں ۹ و ۱۰ جہاد کے بارے میں احکام و فضائل کے موضوع پر ہیں اور ان میں قرآن و حدیث کا اچھا خاصا ذخیرہ مرتب انداز میں پیش کیا گیا ہے۔
دونوں جلدوں کے مجموعی صفحات ایک ہزار سے زائد ہیں اور قیمت درج نہیں ہے۔
ملنے کا پتہ: دفتر انجمن خدام الدین، شیرانوالہ گیٹ، لاہور
ختم نبوت اور قادیانی
مرزا غلام احمد قادیانی اور اس کے پیروکاروں نے اپنی جھوٹی نبوت کے پرچار کے لیے قرآن کریم کی آیت ختم نبوت کی درازکار تاویلات کا سہارا لے کر مکروفریب کا جو جال پھیلایا ہے، اسے ہر دور میں علماء حق نے دلائل کے ساتھ بے نقاب کیا ہے۔ زیرنظر کتابچہ اسی موضوع پر مولانا حکیم محمود احمد ظفر نے تحریر کیا ہے اور علمی انداز میں اہل اسلام کے موقف کی وضاحت کی ہے۔
صفحات ڈیڑھ سو سے زائد، قیمت درج نہیں۔ اور ملنے کا پتہ: ادارہ معارف اسلامیہ، مبارک پورہ، سیالکوٹ۔
عقیدۃ اہل الاسلام فی حیاۃ عیسٰی علیہ السلام
اس کتابچہ میں مولانا حکیم محمود احمد ظفر نے حضرت عیسٰی علیہ السلام کی حیاتِ جسمانی اور نزول کے بارے میں اہلِ اسلام کے اجماعی عقیدہ کی دلائل کے ساتھ وضاحت کی ہے اور قادیانی دلائل کے مکر و فریب کا پردہ چاک کیا ہے۔ یہ کتابچہ ڈیڑھ سو صفحات پر مشتمل ہے اور مندرجہ بالا پتہ سے حاصل کیا جا سکتا ہے۔
ماہنامہ حق چاریارؓ کا مولانا محمد امین صفدرؒ نمبر
تحریکِ خدامِ اہلِ سنت کے ترجمان ماہنامہ ’’حق چاریارؓ‘‘ لاہور نے مناظرِ اہلِ سنت حضرت مولانا امین صفدرؒ کی علمی و دینی خدمات پر ساڑھے تین سو سے زائد صفحات پر مشتمل ضخیم اور معلوماتی نمبر پیش کیا ہے جس میں مولانا محمد امین صفدر رحمہ اللہ تعالیٰ کی بیشتر خدمات کا احاطہ کیا گیا ہے۔
قیمت ۱۲۰ روپے۔ ملنے کا پتہ: متصل جامع مسجد برکت علی، مدینہ بازار، ذیلدار روڈ، اچھرہ، لاہور۔
