یہ امر ہمارے لیے بے حد باعثِ مسرت ہے کہ مدرسہ نصرۃ العلوم گوجرانوالہ کے ایک فارغ التحصیل طالب علم محمد سیف الرحمٰن قاسم کو، جو سعودی عرب کی ام القریٰ یونیورسٹی مکہ مکرمہ کے ادارۂ عربی زبان وادب میں شعبہ تخصص لغت و تربیت میں زیر تدریس ہیں، قابلِ رشک اعزاز سے نوازا گیا ہے۔ طالب علم مذکور کو طلبہ کے امور کی نظامت کی طرف سے ۴۱۱اھ کے دوسرے سیشن کا مثالی طالب علم قرار دیاگیا ہے۔ اس ضمن میں انہیں یونیورسٹی کی طرف سے ایک خصوصی تقریب میں خصوصی سند اور ایوارڈ عطا کیا گیا ہے۔ یاد رہے کہ موصوف کا یہ امتیاز عالمی سطح کا اعزاز ہے، کیونکہ اس شعبے میں دنیا کے مختلف براعظموں کے طلبہ زیر تعلیم ہیں۔
ہم مدرسہ نصرۃ العلوم گوجرانوالہ کے وقار اور اعتبار پر خدائے بزرگ و برتر کا شکر ادا کرتے ہیں اور طالب علم کو ہدیۂ تبریک پیش کرتے ہوئے ان کی دنیا و آخرت کی فائز المرامی کے لیے دعاگو ہیں۔ (ادارہ)
