مولانا ندویؒ کی وفات پر پورا عالمِ اسلام غمزدہ ہے
پاکستان شریعت کونسل کے امیر مولانا فداء الرحمٰن درخواستی ؒ عمرہ کی ادائیگی کے بعد کراچی واپس پہنچ گئے ہیں۔ گزشتہ روز انہوں نے کونسل کے سیکرٹری جنرل مولانا زاہد الراشدی سے فون پر ملک کی موجودہ صورتحال پر تبادلہ خیال کیا اور دونوں راہنماؤں نے کونسل کی مرکزی مجلسِ شورٰی کے اجلاس کے بارہ میں مشورہ کیا جو اگلے ماہ طلب کیا جا رہا ہے۔
دریں اثنا مولانا فداء الرحمٰن درخواستی ؒ نے مفکرِ اسلام حضرت مولانا سید ابو الحسن علی ندویؒ کی وفات پر گہرے رنج و غم کا اظہار کرتے ہوئے ایک بیان میں کہا ہے کہ مولانا ندویؒ عالمِ اسلام کی عظیم علمی و دینی شخصیت تھے اور ان کی وفات پر پوری ملتِ اسلامیہ سوگوار ہے۔ انہوں نے دعا کی کہ اللہ تعالیٰ حضرت مرحوم کو جوارِ رحمت میں جگہ دیں اور پسماندگان کو صبر جمیل کی توفیق سے نوازیں۔
پاکستان شریعت کونسل کے دیگر راہنماؤں مولانا زاہد الراشدی، مولانا منظور احمد چنیوٹی، مولانا قاری سعید الرحمٰن، مولانا حامد علی رحمانی، مولانا اکرام الحق خیری، مولانا سیف الرحمٰن ارائیں، مولانا قاری جمیل الرحمٰن اختر، مولانا محمد حسن کاکڑ، مولانا سخی داد خوستی اور مولانا احسان اللہ ہزاروی نے بھی حضرت ندویؒ کی وفات پر گہرے رنج و غم کا اظہار کرتے ہوئے ان کی دینی و ملی خدمات پر خراجِ عقیدت پیش کیا ہے اور بلندئ درجات کی دعا کی ہے۔
مولانا زاہد الراشدی کا دورہ برطانیہ
پاکستان شریعت کونسل کے سیکرٹری جنرل مولانا زاہد الراشدی نے ۱۶ رمضان المبارک سے برطانیہ کا دو ہفتے کا دورہ کیا اور ابوبکرؓ اسلامک سنٹر (ساؤتھال)، ہدایہ سنٹر (ہیز، مڈل سیکس)، مسجد طیبہ (واش وڈ ہیتھ، برمنگھم)، مسجد ابوبکرؓ (والسال)، مسجد فاروق اعظمؓ (برنلے)، پاکستان سنٹر (نوٹنگھم)، اور مسجد قوت الاسلام (کراؤلی) میں تراویح میں ختمِ قرآن کریم کی تقریبات اور دیگر اجتماعات سے خطاب کیا۔ مولانا راشدی ۲۹ رمضان المبارک کو گوجرانوالہ واپس پہنچ گئے اور انہوں نے نمازِ عید الفطر حسبِ معمول مرکزی عید گاہ، مبارک شاہ روڈ، گوجرانوالہ میں پڑھائی۔
جامعہ دارالعلوم کراچی کے فضلاء متوجہ ہوں
جامعہ دارالعلوم کراچی کے تعلیمی سال کے آغاز اور افتتاح بخاری کے موقع پر بروز اتوار، پیر مورخہ ۲۹/ ۳۰ شوال ۱۴۲۰ھ مطابق ۶/ ۷ فروری ۲۰۰۰ء کو دو روزہ اجتماع منعقد ہو رہا ہے جس میں جامعہ دارالعلوم کراچی کے دورہ حدیث، تخصص فی الافتاء، اور شعبہ تجوید و قراءت کے تمام فضلاء کی دستاربندی کا فیصلہ گیا ہے۔ اس اجتماع میں تعلیمی و تربیتی مجالس کا بھی اہتمام کیا جائے گا۔ ان فضلاء سے درخواست ہے کہ وہ فوری طور پر اپنے کوائف اور موجودہ پتہ فون نمبر وغیرہ سے دفتر تعلیمات جامعہ دارالعلوم کراچی کو مطلع کریں۔
ناظم تعلیمات، جامعہ دارالعلوم کراچی، ڈاکخانہ دارالعلوم کراچی ۱۴
ایک ضروری اعلان: اہلِ علم توجہ فرمائیں
مرزا غلام احمد قادیانی نے ایک قصیدہ لکھ کر علماء اسلام سے اس کا جواب طلب کیا۔ علماء کرام میں سے پروفیسر مولانا قاضی ظفر الدین اورینٹل کالج لاہور نے اس کا جواب ’’قصیدہ رائیہ بجواب قصیدہ مرزائیہ‘‘ تحریر فرمایا اور مولانا حکیم شاہ غنیمت حسین اشرفی نے ’’ابطالِ اعجازِ مرزا‘‘ کے نام سے دو جلدوں میں شائع کیا ہے۔
ملک بھر کے تمام دینی رہنماؤں اور علماء کرام سے درخواست ہے کہ جن حضرات کے پاس ان کتب میں سے کوئی کتاب موجود ہو تو مطلع فرمائیں۔ عالمی مجلسِ تحفظِ ختمِ نبوت ان کتابوں کو شائع کرنا چاہتی ہے، امید ہے کہ اس پر توجہ دی جائے گی۔
جواب کیلئے: مولانا عزیز الرحمٰن جالندھری، مرکزی ناظمِ اعلیٰ، عالی مجلسِ تحفظِ ختمِ نبوت، حضوری باغ روڈ، ملتان۔
